Waziri wa Afya Aden Duale, amesimamisha huduma zote za upachikaji figo katika hospitali za Mediheal kufuatia madai ya ukiukaji sheria.
Akizungumza leo Alhamisi katika jumba la Afya Jijini Nairobi, waziri wa Afya Aden Duale alisema agizo hilo limesababishwa na malalamishi kuhusu taratibu za upachikaji figo katika hospitali ya Mediheal tawi la Eldoret.
Duale alisisitiza kujitolea kwa wizara ya afya kulinda usalama wa wagonjwa na kurejesha imani ya umma katika huduma za matibabu nchini Kenya.
Wakati huo huo waziri Duale alibuni kamati huru ya wataalam itakayofanya uchunguzi kamili kuhusu huduma za upachikaji figo katika hospitali zote za Mediheal zilizotolewa katika kipindi cha miaka mitano iliyopita, na kuwasiisha ripoti yake katika muda wa siku 90 zijazo.
Kamati hiyo imejukumiwa kuchunguza mifumo ya usimamizi ya hospitali hizo, utendakazi wa kliniki, kubainisha iwapo zimetimiza mahitaji ya kimaadili na taratibu za kiusalama za wagonjwa.
Waziri huyo alimsimamisha kazi Dkt. Maurice Wakwabubi ambaye ni kaimu mkuu wa kitengo cha utoaji na uhifadhi wa damu na huduma za upachikaji viungo, na Dkt. Everlyne Chege, mwenyekiti wa kamati ya kiufundi ya wizara ya afya iliyofanya uchunguzi wa kinidhamu kuhusu swala hilo mwezi Disemba mwaka 2023.
Dr. Martin Sirengo, Naibu Mkuu Mkurugenzi wa huduma za matibabu sasa ndiye kaimu mkuu wa kitengo cha utoaji uhifadhi wa damu na upachikaji wa viungo vya mwili.
Katika mkutano huo, Duale alikuwa ameandamana na katibu wa idara ya afya ya umma Mary Muthoni, mwenzake wa huduma za matibabu Dkt. Ouma Oluga na Mkurugenzi wa Afya Dkt. Patrick Amoth.
