Chama cha Waendesha na Wamiliki wa Bodaboda nchini Kenya kimewasilisha ombi Bungeni kikilalamikia madai ya vitendo visivyo vya haki katika utoaji mikopo na ufadhili wa ununuzi wa pikipiki unaofanywa na kampuni ya Mogo Auto Limited.
Spika wa Bunge la Kitaifa Moses Wetang’ula, alisoma ombi hilo Bungeni, akieleza wasiwasi wa waendesha bodaboda kuhusu taratibu za ukopeshaji za kampuni hiyo.
Miongoni mwa masuala yaliyoibuliwa ni madai ya viwango vya juu vya riba na gharama nyingine, kutotolewa kwa maelezo ya kutosha kuhusu masharti ya mikopo, taratibu za kunyang’anywa pikipiki na maswali kuhusu umiliki wa pikipiki zinazofadhiliwa.
Ombi hilo pia linaibua wasiwasi kuhusu madai ya bima, ulinzi wa data, vifaa vya ufuatiliaji na kuwekwa kwa wakopaji kwenye orodha mbaya za mashirika ya taarifa za mikopo.
Chama hicho kinataka Bunge lifanye uchunguzi kubaini iwapo kampuni ya Mogo inazingatia sheria na kanuni zinazodhibiti utoaji wa mikopo na ufadhili wa mali.
Wanabodaboda pia wanataka hatua zichukuliwe kuwalinda waendesha bodaboda na wakopaji wengine dhidi ya kile wanachodai kuwa ni vitendo visivyo vya haki kibiashara.
Ombi hilo limeelekezwa kwa Kamati ya Maombi ya Umma kwa ajili ya kuchunguzwa na kutoa ripoti Bungeni na kwa mwombaji.
Hatua hiyo imeongeza tena mjadala wa Bunge kuhusu changamoto za kifedha zinazowakabili waendesha bodaboda wanaotegemea ufadhili wa mali kupata pikipiki kwa ajili ya kujikimu.
