Waziri wa Afya, Aden Duale, ametoa maelezo kuhusu kisa cha kwanza kilichothibitishwa cha Ebola kilichoingizwa nchini Kenya.
Amehimiza Wakenya kuwa watulivu na waangalifu, serikali inapoimarisha hatua za kuzuia kuenea kwa virusi hivyo.
Duale alisema kisa hicho kilithibitishwa Oktoba 6, 2026, baada ya wahudumu wa afya katika Hospitali ya Nairobi kwa ushirikiano na Wizara ya Afya kumtambua na kumfanyia uchunguzi mgonjwa huyo, lakini alifariki baadaye.
Wizara, kwa ushirikiano na Shirika la Msalaba Mwekundu la Kenya, ilifanya mazishi salama na yenye heshima kwa kuzingatia taratibu za afya ya umma.
Duale alisema idadi ya watu waliotambuliwa kuwa waliwasiliana na mgonjwa huyo imeongezeka kutoka 55 hadi 57.
Kati yao, watu 10 wamepatikana, kuwekwa karantini na wanafuatiliwa kila siku katika Hospitali ya Kitaifa ya Polisi jijini Nairobi. Juhudi za kutafuta wengine zimeimarishwa.
Vituo vitano vya afya vimetengwa kushughulikia wagonjwa wa Ebola, kama Hospitali ya Kitaifa ya Kenyatta, Hospitali ya Moi ya Mafunzo na Rufaa, Hospitali ya Kitaifa ya Polisi, Hospitali ya Portreitz na Hospitali ya Nairobi.
Uchunguzi wa wasafiri kutoka maeneo yaliyoathiriwa na Ebola pia umeimarishwa katika Uwanja wa Ndege wa Kimataifa wa Jomo Kenyatta na maeneo yote ya kuingilia nchini.
Duale aliwataka Wakenya kuzingatia usafi wa mikono, kuepuka kuwasiliana na watu wagonjwa na kuripoti visa vinavyoshukiwa katika vituo vya afya vinavyotambuliwa au kupitia nambari ya bila malipo ya Wizara, 719.
