Watu 17 wameaga dunia, baada ya kuhusika kwenye ajali ya barabarani katika eneo la Salama, kaunti ya Makueni.
Ajali hiyo iliyotokea kwenye Barabara Kuu ya Nairobi – Mombasa Jumamosi asubuhi, ilihusisha gari la abiria 14 na lori la kubeba mizigo, baada ya lori hilo kudaiwa kukumbwa na hitilafu za breki na kupoteza mwelekeo.
Kanisa katoliki limethibitisha ajali hiyo, likisema waathiriwa hao 17 walitoka katika kanisa katoliki la St. Mathias Mulumba Parokia ya Mikindani, na walikuwa wakielekea kwenye madhabahu ya Subukia kaunti ya Nakuru kwa maombi ya kitaifa.
Kwenye taarifa Kasisi Mkuu Martin Kivuva wa dayosisi ya Mombasa, alithibitisha kutokea kwa ajali hiyo.
“Tunasikitika tukiwa na huzuni kubwa kutangaza vifo vya washirika 17 wa kanisa katoliki la St. Mathias Mulumba, Mikindani, kupitia kwa ajali katika eneo la Salama. Washirika hao walikuwa walielekea katika madhabahu ya Subukia kwa siku ya maombi ya kitaifa,” alisema Kasisi huyo Mkuu.
Watu wengine saba walijeruhiwa na walipelekwa katika hospitali ya kaunti ndogo ya Sultan Hamud kwa matibabu.
Eneo hilo la Salama limenakili ajali kadhaa hapo awali, na ambazo zimesababisha maafa na majeraha kwa wasafirii, ya hivi punde ikiwa ile iliyotokea Juni 8, iliyohusisha magari manne.
