Rais Ruto aangazia mpango mpana wa maendeleo ya miundombinu

Alitaja miradi muhimu kama barabara ya Isiolo-Wajir-Mandera yenye urefu wa kilomita 750.

Marion Bosire
2 Min Read

Rais William Ruto ametangaza mpango wa kupanua miundombinu nchini kupitia uwekezaji katika barabara, reli, viwanja vya ndege, nishati na miradi ya maji.

Akihutubia taifa katika Bunge la Taifa, Novemba 18, 2026, Ruto alisema takriban kilomita 7,000 za barabara zinaendelea kujengwa.

Kiongozi wa nchi alisema pia kwamba serikali inalenga kuweka lami kilomita 28,000 na kujenga barabara za safu mbili zenye urefu wa kilomita 2,500 katika kipindi cha miaka 10 ijayo.

Miradi muhimu ni pamoja na barabara ya Isiolo-Wajir-Mandera yenye urefu wa kilomita 750, Barabara ya Mzunguko wa Ziwa Victoria, barabara za Mau Mau na upanuzi wa barabara kuu ya Nairobi-Mombasa.

Serikali pia inapanga kupanua reli ya kisasa kutoka Naivasha kupitia Narok na Bomet hadi Kisumu na Malaba, pamoja na kuboresha bandari za Mombasa na Lamu.

Katika Uwanja wa Ndege wa Kimataifa wa Jomo Kenyatta, mpango wa kisasa wenye thamani ya shilingi bilioni 154.2 unaendelea ili kuongeza uwezo wa kuhudumia abiria.

Katika sekta ya nishati, serikali inalenga kuongeza uzalishaji wa umeme kwa megawati 10,000, kujenga mabwawa makubwa 50 na madogo 200, pamoja na kupanua miundombinu ya unyunyiziaji mashamba maji katika ekari milioni 2.5.

Ruto alisema Mfuko wa Kitaifa wa Miundombinu, wenye mtaji wa Sh bilioni 340, utasaidia kufadhili miradi ya maendeleo ya muda mrefu.

Share This Article