Chama cha Wanasheria nchini Kenya, LSK kimeongeza shinikizo kwa polisi kuchunguza kutoweka kwa Wakili Abshir Ahmedsadak Abdi, kikitaka arejeshwe salama na waliohusika wawajibishwe.
Katika taarifa iliyotolewa na Rais wa LSK, Charles Kanjama, chama hicho kimesema Mahakama Kuu ya Milimani inatarajiwa kutoa uamuzi kuhusu kesi ya kutoweka kwake kesho Jumanne, Novemba 10, 2026.
Uamuzi huo unafuatia maandamano ya mawakili ya Purple Ribbon yaliyofanyika Novemba 6, ambapo waliwasilisha hati ya malalamiko katika ofisi ya Inspekta Jenerali wa Huduma ya Kitaifa ya Polisi, iliyoko Jogoo House, wakitaka uchunguzi wa haraka na uwajibikaji.
Ingawa Inspekta Jenerali hakuwepo kupokea hati hiyo binafsi, LSK imethibitisha kuwa ilikabidhiwa kwa mafanikio katika ofisi yake.
Chama hicho kimewataka mawakili kuhudhuria kwa wingi vikao vya mahakama kabla ya kuandamana kuelekea Jogoo House kudai majibu ya kina kutoka kwa polisi.
Baada ya kikao cha Baraza kilichofanyika Novemba 7, LSK pia ilitangaza mipango ya kuendeleza maandamano na hatua nyingine za kisheria katika kipindi chote cha wiki hii.
LSK imeonya kuwa kutoweka kwa Abdi kunatishia uhuru wa taaluma ya sheria na utawala wa sheria, ikiahidi kutochoka hadi atakaporejeshwa salama.
