Chongqing: Jioni moja ya kiangazi katika eneo la kibiashara la Guanyinqiao mjini Chongqing, vijana waliovalia mavazi ya cosplay waliingia katika jengo la kibiashara lililo tofauti na maduka makubwa ya kitamaduni. Badala ya kuingia katika maduka ya rejareja, walijikuta maeneo ya kucheza, studio za upigaji picha, vyumba vya kujipamba bila malipo na maeneo yenye mandhari ya wahusika maarufu wa burudani, maarufu kama IP.
Eneo hilo, linalojulikana kama “Dream Factory” na kuendeshwa na Chongqing Department Store, ni kituo cha kwanza cha kibiashara nchini China kinachojikita katika ‘anime’ na ‘comics.’ Zaidi ya asilimia 55 ya eneo lake limebadilishwa kuwa maeneo ya shughuli nakufurahia. Kwa wageni, kivutio si bidhaa zinazouzwa pekee, bali pia uhusiano wa kitamaduni na uzoefu wa pamoja unaojengwa kuzunguka bidhaa hizo.
Mabadiliko hayo yanaakisi mwelekeo mpana unaoshuhudiwa katika matumizi nchini China. Takwimu kutoka ofisi ya taifa ya takwimu zinaonyesha kuwa mauzo ya rejareja ya huduma nchini humo yaliongezeka kwa asilimia 5.3 mwaka hadi mwaka katika nusu ya kwanza ya mwaka, ikiwa ni ongezeko la asilimia 4.2 zaidi ya mauzo ya bidhaa. Matumizi ya huduma yanazidi kuwa kichocheo muhimu cha mahitaji ya ndani.
Chongqing pia inashuhudia mwelekeo kama huo. Katika nusu ya kwanza ya mwaka, sekta ya huduma ya jiji hilo ilichangia asilimia 62 ya pato la taifa (GDP), huku thamani yake ikifikia yuan trilioni 1.03, sawa na takribani dola bilioni 144 za Marekani, na kuwa mchango muhimu katika ukuaji wa uchumi.
Kadri wenyeji na wageni wanavyozidi kutafuta njia za kujifurahisha, uhusiano wa kitamaduni na huduma bora, Chongqing inabadilisha maeneo ya biashara na alama zake za mijini kutoka sehemu za kufanya manunuzi na kuwa vituo vya burudani na mwingiliano wa kijamii.
Mabadiliko katika kituo cha Chongqing Department Store kilichopo Jiangbei yanaonyesha jinsi maeneo ya jadi ya rejareja yanavyojirekebisha kulingana na mahitaji mapya ya watumiaji. Duka hilo la zamani limeondoa kaunta za kawaida za mauzo na kuanzisha maeneo kwa ajili ya matukio yanayohusisha IP, shughuli za cosplay, upigaji picha na burudani.
Tofauti na mifumo ya jadi ya rejareja inayotegemea zaidi mauzo ya bidhaa, mradi huo unatumia maudhui na uzoefu kuwavutia wageni na kubadilisha idadi ya watu wanaotembelea eneo hilo kuwa mauzo.
Mfano mwingine ni “The Ring Chongqing” katika eneo jipya la Liangjiang. Eneo lake linaloitwa “Muguang Forest” lina ukuta wa kijani wenye urefu wa mita 42, maporomoko ya maji yenye urefu wa mita 20 na maelfu ya mimea ya kitropiki, na hivyo kuunda mazingira ya asili yanayompa mgeni uzoefu wa kipekee ndani ya jengo la biashara. Pia kuna hifadhi ya maji yenye urefu wa mita saba yenye zaidi ya samaki 5,000 wa mapambo, ambayo imekuwa kivutio maarufu tangu ilipofunguliwa.
Mifano hii inaonyesha jinsi maeneo ya kibiashara mjini Chongqing yanavyobadilika kutoka kuwa sehemu rahisi za kufanya manunuzi na kuwa vituo vinavyotegemea zaidi furaha ya watumiaji.
Mabadiliko hayo pia yanaenea nje ya majengo ya kibiashara hadi katika mitaa ya kihistoria na alama za mijini.
Huko Daijiaxiang katika wilaya ya Yuzhong, mitaa iliyoko kwenye miinuko mikali iliyokuwa imepuuzwa imefanyiwa ukarabati na kubadilishwa kuwa maeneo yanayochanganya utalii, chakula na uzoefu wa kitamaduni. Mikahawa ya mtindo wa kontena yenye rangi ya chungwa, migahawa iliyo kando ya mto na studio za upigaji picha sasa zimejengwa kandokando ya miinuko hiyo, na kuwapa wageni njia mpya za kufurahia mandhari ya kipekee ya Chongqing.
Mkazi mmoja kwa jina Zhou alisema hapo awali watu walitembelea zaidi Jiefangbei kwa ajili ya kufanya manunuzi. Hata hivyo, sasa wanaweza kutumia mchana kufurahia mandhari ya Daijiaxiang kabla ya kuelekea Shibati iliyo karibu kwa ajili ya chakula na shughuli za kitamaduni.
Kwa kutumia mito, miinuko, vichochoro, mapango na mitaa ya kihistoria, Chongqing inageuza mandhari yake ya kipekee ya jiji la milima kuwa maeneo mapya ya matumizi ya huduma.
Ili kudumisha kasi hii, Chongqing inaendelea kuboresha sekta yake ya huduma, kuimarisha huduma kwa watumiaji, kukuza chapa za ndani na kuendeleza ushirikiano wa kina kati ya biashara, utamaduni, utalii na michezo.
Maduka makubwa yanageuka kuwa majukwaa ya mwingiliano, huku mitaa ya kihistoria ikibadilika na kuwa vituo vya utamaduni. Kadri watumiaji wanavyozidi kulipia uzoefu na mahusiano ya kijamii, Chongqing inabadilisha maeneo yake ya kibiashara na mandhari yake ya kipekee ya mijini kuwa injini mpya za matumizi ya huduma.
Kwa hisani ya iChongqing.info
