Kaunti ya Pokot Magharibi imepanga kushirikisha wafugaji katika kukuza mbinu bora za kilimo ili kuhakikisha upatikanaji wa malisho ya kuaminika kwa mifugo wao kupitia utoaji wa miche na kujenga uwezo wa wakulima.
Gavana wa eneo hilo, Simon Kachapin, akizungumza katika Maonesho ya Kila Mwaka ya Kilimo na Biashara ya Kaunti ya Pokot Magharibi, alisema kuwa kwa muda mrefu kaunti hiyo imekuwa ikishuhudia wahamaji wa wafugaji kuvuka mpaka na kuingia nchini Uganda kutafuta malisho wakati wa ukame.
Kachapin alisema kuwa tayari wameandaa mpango wa kuhakikisha kuwa wakulima wanalima malisho na kuyahifadhi kwa ajili ya kuuza au kwa matumizi ya mifugo wao wakati wa ukame.
Aliongeza kuwa kaunti hiyo ina uwezo mkubwa wa kulisha mifugo yake kutokana na uwepo wa ardhi kubwa ambayo inaweza kubadilishwa kuwa mashamba ya kufugia (ranches).
Kachapin alibainisha kuwa wananuia kuwa wazalishaji bora wa nyama ya ng’ombe nchini kwa kuboresha thamani ya bidhaa (value addition) na kugeuza ufugaji kuwa biashara.
Aidha, alihamasisha wakulima kuzingatia mbinu za kisasa za kilimo ili kuongeza uzalishaji.
Alisema kuwa maonesho ya kilimo yameandaliwa kwa namna ya kuzingatia mahitaji ya wakazi wa eneo hilo, hasa kwa kuhimiza kilimo bora na rafiki kwa mazingira hata katika maeneo madogo ili kuongeza mavuno.
Mkazi mmoja, David Lokorio, pamoja na wengine waliohudhuria maonesho hayo, walisema kuwa maonyesho hayo ni ushahidi kuwa Pokot Magharibi na kaunti nyingine za kame katika eneo la North Rift zina uwezo wa kujilisha zenyewe.
Philemon Kopus na Elizabeth Lomingan walisema kuwa watatumia maarifa waliyopata katika maonesho hayo kuboresha shughuli zao za kilimo na ufugaji.
