Awamu ya 12 ya tamasha la sanaa la Ubumuntu itaandaliwa jijini Kigali nchini Rwanda, Julai 13 hadi 19, 2026.
Hafla hiyo itawakutanisha wasanii, waandishi, watumbuizaji na watazamaji kutoka Rwanda na sehemu mbalimbali za dunia kusherehekea nguvu ya sanaa katika kuleta mabadiliko chanya.
Kaulimbiu ya mwaka huu ikiwa, “Kukumbatia Muda: Kushikilia. Kushikamana,” tamasha hilo la wiki moja litakuwa na maonyesho ya tamthilia, muziki, fasihi, warsha na mijadala ya hadhara yenye lengo la kuhamasisha uponyaji, kumbukumbu, mazungumzo na mshikamano wa kijamii.
Shughuli zitaanza Julai 13 kwa Siku ya Afya ya Akili katika Inzira Creative, ambapo kutakuwa na warsha na mijadala kuhusu nafasi ya sanaa katika kuimarisha afya ya akili.
Siku inayofuata, tamasha litaangazia fasihi kupitia usomaji wa mashairi, simulizi za hadithi na mijadala itakayoonyesha nguvu ya ubunifu katika kujieleza.
Julai 16, Camp Kigali itakuwa mwenyeji wa ‘Ikaze Night & Music Is Humanity’ hafla ya kusherehekea umoja kupitia muziki.
Tamasha litahitimishwa kwa maonyesho ya siku tatu, nyakati za usiku, ya Ubumuntu Classic katika Kituo cha Kumbukumbu ya Mauaji ya Kimbari cha Kigali kuanzia Julai 17 hadi 19.
Makundi ya tamthilia ya ndani nchini Rwanda na kimataifa, wachezaji wa densi na wasanii mbalimbali watahusishwa kwenye maonyesho hayo.
Mwanzilishi na mkurugenzi wa kisanii wa tamasha hilo, Hope Azeda, alisema kaulimbiu ya mwaka huu inaakisi umuhimu wa kukumbatia kumbukumbu, matumaini na ustahimilivu huku ikitoa nafasi za uponyaji na kuimarisha uhusiano kati ya watu.
Tangu kuanzishwa kwake mwaka 2015, Tamasha la Sanaa la Ubumuntu limekua na kuwa moja ya matukio makubwa ya kitamaduni nchini Rwanda yanayohamasisha amani, maridhiano na ubinadamu wa pamoja kupitia sanaa.
