Waziri wa Usalama wa Ndani na Utawala wa Kitaifa, Kipchumba Murkomen, ametoa onyo kali kwa wanaofadhili na kuwezesha uhalifu wa ujambazi wa kutumia silaha huko Samburu, West Pokot, Tiaty na Isiolo.
Akizungumza katika eneo la Lolmolok, Wadi ya Suguta, Kaunti ya Samburu, Murkomen alisema kuwa wale wanaofadhili na kuratibu mashambulizi ya majambazi watakabiliwa na mkono mzito wa sheria na vyombo vya usalama bila kuchoka.
“Tunajua mlipo, na tutawafuata. Kupitia operesheni zinazoongozwa na taarifa za kijasusi, tutawapata popote mlipo, bila kujali nyinyi ni kina nani na lazima tukabiliane nanyi kwa mujibu wa sheria,” alisema.
Murkomen alisema Serikali itaanzisha operesheni ya usalama itakayoongozwa na Inspekta Jenerali wa Polisi, Douglas Kanja, na kuwataka wakazi wanaomiliki silaha kinyume cha sheria kuzitoa kwa hiari kabla ya polisi kuanza msako dhidi yao.
Alisema operesheni hiyo inalenga kuimarisha usalama, kuwezesha familia zilizohamishwa makwao kurejea nyumbani na kuhakikisha uwepo wa utulivu wa kudumu katika maeneo yaliyoathirika.
“Tulichofanya katika maeneo mengine ya Bonde la Kerio ndicho tutakachofanya hapa hadi eneo hili litakapokuwa na amani,” alisema.
Hatua nyingine alizotangaza ni pamoja na kuajiri polisi zaidi wa Akiba wa Polisi wa Kitaifa na kuendeleza miundombinu kama vile vituo vya usalama, barabara na upanuzi wa huduma za mtandao wa simu.
Waziri huyo alikuwa ameandamana na Inspekta Jenerali wa Polisi Douglas Kanja, Naibu Inspekta Jenerali wa Polisi wa Utawala Gilbert Masengeli, Kamanda wa Kikosi cha GSU Johana Tonui pamoja na maafisa wengine waandamizi serikalini.
Pia aliungana na Gavana wa Kaunti ya Samburu Jonathan Lelelit, Wabunge Naisula Lesuuda wa Samburu Magharibi na Eli Letipila wa Samburu Kaskazini, aliyekuwa Gavana Moses Lenolkulal, na wawakilishi wadi wakiongozwa na James Leleruk wa Wadi ya Suguta.
