Mwanamuziki wa Kenya Bien-Aimé Baraza anapiga hatua kubwa kuelekea mafanikio ya kimataifa baada ya wimbo wake “I’ll Be Okay” kusambaa kwa kasi, kulingana na mkewe ambaye pia ni meneja wake, Chiki Kuruka.
Mwimbaji huyo ametia saini mkataba na kampuni ya Quality Control Music, ya Marekani.
Katika chapisho kwenye mitandao ya kijamii, Chiki alifichua kuwa mradi huo ulikuwa ukiandaliwa kwa zaidi ya mwaka mmoja huku timu yake ikitafuta washirika sahihi wa kimataifa ili kutimiza azma ya Bien ya kupenya soko la dunia.
Alieleza kuwa kumtangaza mwanamuziki wa Kenya katika soko la kimataifa huwa kunakabiliwa na changamoto nyingi, zikiwemo vikwazo vya visa, bajeti finyu na ufahamu mdogo kuhusu tasnia ya muziki nchini Kenya duniani.
Chiki alisema yeye na mshirika wake, $ir Tek, walitembelea kampuni mbalimbali za kurekodi muziki katika nchi tofauti, lakini wakakataa ofa zilimworodhesha Bien kuwa msanii wa soko la Afrika pekee.
Hatimaye, walipata lebo ya kimataifa ambayo wawakilishi wake, wanaojulikana kama Coach na P, walimtaja Bien kama nyota wa kiwango cha kizazi mwenye uwezo wa kufanya vizuri katika masoko mbalimbali duniani.
Chiki pia alifichua kuwa kukamilisha taratibu za kisheria na timu hiyo ya kimataifa kulichukua karibu miezi tisa, hali iliyosababisha kucheleweshwa kwa matangazo, wimbo huo na albamu.
