Timu ya DCI Queens imeanza vyema kampeni yake katika Ligi Kuu ya Voliboli ya Wanawake ya Kenya, KVF, BETPAWA, baada ya kuilaza KDF seti 3-1 katika mechi iliyochezwa Uwanja wa Nyayo jijini Nairobi.
Queens, ambao wanalenga kutwaa ubingwa msimu huu baada ya kushiriki ligi ya Kenya Cup msimu uliopita, walilazimika kupambana baada ya KDF kushinda seti ya kwanza alama 26-24, wakitumia vyema makosa ya wapinzani wao.
Hata hivyo, DCI Queens walirejea kwa nguvu katika seti ya pili, huku mchezeshaji Jane Mumbua akiongoza mchezo na washambuliaji wa upande wa kushoto Sarah Namisi na Mercy Iminza wakiongoza mashambulizi.
Juhudi zao ziliiwezesha timu hiyo kushinda seti ya pili alama 25-18 na kusawazisha matokeo.
Seti ya tatu ilikuwa na ushindani mkali, lakini Queens walidumisha utulivu katika dakika muhimu na kushinda alama 25-23, hivyo kuongoza seti 2-1.
Katika seti ya nne, Queens waliongeza kasi ya mchezo kwa mashambulizi makali na ulinzi imara, na kuibuka washindi alama 25-17.
Ushindi huo wa jumla wa seti 3-1 unaipa DCI Queens mwanzo mzuri katika harakati zao za kutwaa ubingwa wa ligi msimu huu.