Serikali inatoa motisha ili kuvutia wawekezaji katika sekta ya utengenezaji bidhaa, Rais William Ruto amesema.
Rais alisema lengo ni kukuza sekta ya viwanda nchini hadi kufikia asilimia 20 ya Pato la Taifa, GDP ifikapo mwaka 2030.
Alisema kuwa uwekezaji wa kimkakati katika viwanda utaongeza mauzo ya nje, kutoa fursa za ajira, kukuza shughuli za kiuchumi kwa kutumia rasilimali za ndani na kuleta mapato ya kuvutia kwa wawekezaji.
Rais Ruto alisema, kwa hivyo, sio busara kutoa misamaha ya ushuru na kutoza ushuru kwa waagizaji wa bidhaa zinazoweza kuzalishwa humu nchini.
“Tutazingatia sera na mkakati wetu katika kuhimiza ongezeko la uzalishaji wa ndani, kulingana na Ajenda ya Mabadiliko ya Kiuchumi ya Kutoka Chini kwenda Juu,” aliongeza.
Rais alisema Kenya lazima itumie fursa zinazotolewa na Mkataba wa Eneo Huria la Biashara barani Afrika, ambao umeunda soko kubwa la mauzo ya nje ya nchi.
“Tunataka kuunda mifumo ikolojia na njia kwa ajili yetu kulenga soko la nje. Tunataka Kenya iondokane na kuwa soko kuu la mataifa mengine hadi kuwa watengenezaji wa bidhaa zetu kwa ajili ya kuuza nje,” akasema.
Rais William Ruto alizungumza wakati wa uzinduzi wa Kiwanda cha Clinker cha Cemtech Limited huko Sebit, Kaunti ya Pokot Magharibi.
Rais alisema kiwanda hicho cha Shilingi bilioni 45 kitabuni mamia ya nafasi za kazi na kupanua fursa kwa wafanyabiashara katika eneo hilo.
“Kaunti ya Pokot Magharibi inakaribia kukumbwa na ufufuo wa kiuchumi unaohusishwa na kiwanda kipya, ikiwa ni pamoja na mishahara ya juu, matumizi na ongezeko la mapato,” alisema.
Alisema utengenezaji wa ndani wa klinka na chuma umeiokoa nchi fedha za kigeni hadi kufikia dola milioni 500 kwa mwaka.
Aliwataka wawekezaji wa ndani kuchangamkia teknolojia bora zaidi zilizopo ili kukuza ushindani.
Rais alitaja programu nyingine zinazotekelezwa na serikali kuwa ni pamoja na ujenzi wa nyumba za bei nafuu na uanzishwaji wa vituo vya Teknolojia ya Mawasiliano na Habari katika kila wadi ili kufungua fursa za ajira mtandaoni kwa vijana.
“Tutaunda Kenya ambayo haimwachi mtu nyuma,” alisema.
Rais pia alisema mkakati wa serikali wa kufufua uchumi unatoa matokeo mazuri.
“Mlisikia tangazo jana kwamba Soko la Hisa la Nairobi la Kenya ndilo bora zaidi duniani. Thamani ya shilingi ya Kenya dhidi ya dola pia imeboreka kwa kiasi kikubwa,” alisema.
Rais alisema serikali inaimarisha usalama katika Bonde la Kerio ili kuhakikisha kuwa hakuna mtoto anayenyimwa fursa ya kuhudhuria shule.
