Enzi hizi ambazo watu hasa wanawake wamejawa na shinikizo la kufanyiwa upasuaji ili kuboresha umbo na mwonekano, msanii wa muziki nchini Uganda Martha Mukisa ameibuka na ushauri.
Nyota huyo wa muziki amewahimiza watu, hasa wanawake, kukubali na kupenda miili yao ya asili badala ya kuruhusu ukosoaji kwenye mitandao ya kijamii kuathiri jinsi wanavyoonekana.
Martha alisema mitandao ya kijamii inaweza kuwa na madhara, hasa watu wanapotoa maoni hasi kuhusu mwonekano wa wengine. Hata hivyo, alisema ameridhika na kujiamini kuhusu mwili wake na hana mpango wa kufanyiwa upasuaji wa plastiki.
“Sitafanyiwa upasuaji katika sehemu yoyote ya mwili wangu na nitaendelea kuwa mrembo na mwenye mvuto kama nilivyo,” alisema, akiongeza kuwa anaamini tayari ana kile ambacho baadhi ya wanawake hutafuta kupitia taratibu za urembo.
Mwimbaji huyo alisema hana tatizo na watu wanaochagua kufanyiwa upasuaji wa plastiki, lakini alihoji ni kwa nini baadhi huwa na maoni hasi kila mara kuhusu miili ya wengine.
Martha alifichua kuwa amekutana na maoni kadhaa kuhusu mwonekano wake mtandaoni lakini badala ya kuruhusu ukosoaji huo kumvunja moyo, alisema huwa unamtia motisha kuendelea kusonga mbele.
Alihimiza watu kuacha kujilinganisha na viwango visivyo halisi vya urembo na badala yake kuthamini miili waliyozaliwa nayo.
“Tunapaswa kuanza kujipenda jinsi Mungu alivyotuumba,” Martha alisema, akiwahimiza mashabiki wake kujiamini na kukataa unyanyasaji wa miili.
