Idara ya Upelelezi wa Makosa ya Jinai, DCI imemkamata Inspekta wa Polisi Kenneth Kipkemboi Sang, mshukiwa mkuu katika mauaji ya wakili wa Nairobi Mathew Kyalo Mbobu na Dkt. Victoria Nthunya Mutiso.
Katika taarifa iliyotolewa Jumamosi, Oktoba 24, DCI ilisema Sang alikamatwa mjini Eldoret, Kaunti ya Uasin Gishu, kufuatia operesheni iliyoongozwa na taarifa za kijasusi zilizotokana na maelezo kutoka kwa wananchi.
Inspekta huyo, ambaye alikuwa mafichoni kwa miezi kadhaa, alikamatwa kando ya Barabara ya Uganda jijini Eldoret akiwa anaendesha gari aina ya Toyota Fielder la rangi ya fedha, ambalo anadaiwa kuwa alikuwa akijaribu kuliuza ili kujikimu kimaisha.
Wapelelezi wanamshuku Sang kwa kuratibu shughuli zinazohusishwa na mauaji ya Mbobu na kuwasiliana na mshukiwa mwingine ambaye tayari yuko kizuizini.
DCI imesema kukamatwa kwake ni hatua muhimu katika uchunguzi huo, huku wapelelezi wakiendelea kutafuta taarifa zaidi kubaini mazingira ya mauaji hayo na iwapo watu wengine walihusika.
Dkt. Mutiso alipigwa risasi na kuuawa katika eneo la Upper Hill, Nairobi, Julai 29, 2026, huku Mbobu akiuawa Septemba 9, 2025, kando ya Barabara ya Magadi alipokuwa akiendesha gari kuelekea nyumbani kutoka kazini.
DCI hivi karibuni iliunganisha kesi hizo baada ya kubaini kuwa washukiwa wa mauaji ya Mutiso pia walikuwa na maslahi katika mauaji ya Mbobu.
Maafisa wengine wawili wa polisi na washukiwa wengine watatu kutoka familia moja pia wanahusishwa na mauaji hayo, huku mashtaka ya mauaji yakiwa yameidhinishwa dhidi yao.
