Rais William Ruto ametoa wito wa kuwepo kwa ushirikiano wa manufaa kwa pande zote kati ya Afrika na Ufaransa, uliojengwa juu ya heshima ya pamoja na uwajibikaji wa pamoja.
Rais alisema kuwa Mkutano wa Africa Forward unatoa fursa ya kipekee kwa Afrika na Ufaransa kuunda ushirikiano wa kuangalia mbele ambao utaleta maendeleo ya pamoja huku ukiendeleza mageuzi ya muda mrefu ya uchumi wa Afrika.
Alisema kuwa ushirikiano huo haupaswi kujengwa juu ya utegemezi bali usawa wa mamlaka ya kitaifa; si kwa misaada au hisani bali uwekezaji wenye manufaa kwa pande zote; na si kwa uchimbaji au unyonyaji bali ule unaowanufaisha wote.
Alisema hayo wakati wa ufunguzi wa Mkutano wa Africa Forward katika jumba la KICC jijini Nairobi, ambao aliongoza pamoja na Rais Emmanuel Macron wa Ufaransa.
Mkutano huo ulihudhuriwa na Marais 24, mawaziri wakuu watano, makamu wa rais wanne, Katibu Mkuu wa Umoja wa Mataifa António Guterres, na Mwenyekiti wa Tume ya Umoja wa Afrika Mahmoud Ali Youssouf, miongoni mwa wengine.
Rais Ruto alieleza kuwa vipaumbele vya Afrika ni pamoja na kuhamasisha rasilimali za ndani kwa ajili ya maendeleo ya Afrika kwa kiwango kikubwa, mageuzi ya mfumo wa kimataifa wa kifedha, pamoja na maendeleo ya miundombinu ya usafiri, usafirishaji wa mizigo na muunganiko.
Vingine ni mpito wa nishati na maendeleo ya viwanda vya kijani, pamoja na maendeleo ya ujuzi kwa vijana ili kukuza ubunifu, uvumbuzi, ujasiriamali, na mageuzi yanayoendeshwa na akili bandia.
Kwa upande wake, Rais Macron alisema kuwa ushirikiano mpya kati ya Afrika na Ufaransa utajengwa juu ya heshima, ujasiri, na malengo ya pamoja.
Alisema kuwa ajenda ya Ulaya ina kila sababu ya kuona Afrika ikifikia mamlaka kamili ya kiuchumi na kujitegemea.
“Mafanikio yenu ni mafanikio yetu,” alisema.
Kiongozi huyo wa Ufaransa alieleza kuwa pauni bilioni 23 za uwekezaji katika sekta binafsi barani Afrika, pauni bilioni 14 kutoka kwa kampuni za Kifaransa barani Afrika, na pauni bilioni 9 katika biashara za Kiafrika vinaonyesha ushirikiano mpya na dira mpya ya maendeleo endelevu.
Alisema changamoto zinazoikabili Ulaya na Afrika ni za pamoja, akibainisha kuwa mabara yote mawili yanatafuta amani, ustawi, na mamlaka ya kujitawala.
Aliongeza kuwa Ufaransa ina nia ya kutetea utawala wa sheria na sheria za kimataifa, na inaamini katika usawa katika mahusiano ya kibiashara.
