Waziri wa Maji, Unyunyiziaji Mashamba Maji na Usafi Mhandisi Eric Mugaa Murithi leo alizuru bwawa la Muruny Siyoi linalogharimu mamilioni ya pesa katika kaunti ya West Pokot, kutathmini maendeleo ya ujenzi wake.
Waziri alisema bwawa la Siyoi-Muruny ambalo limekamilika kwa kiwango cha asilimia 78 linatarajiwa kukamilika katikati ya mwaka huu.
Lina uwezo wa kuhifadhi lita bilioni 8.9 za maji na litahudumia wakazi 350,000 wa Kaunti ya Pokot Magharibi, ikiwa ni pamoja na miji mikuu ya Makutano, Kapenguria na Chepareria.
Bwawa hilo linahitaji shilingi bilioni 1.5 ili kukamilika.
Waziri Mugaa alisema mradi huo ulioanzishwa mwaka 2015 ni moja ya mabwawa yaliyopangiwa kukamilika kufikia mwezi Juni mwaka huu ili kuhudumia wakazi.
Aliwataka wakandarasi kuongeza kasi katika utekelezaji wa miradi ili kuepuka kuichelewesha hali ambayo mara nyingine husababisha kupanda kwa gharama za uendeshaji wa miradi.
Waziri alionya kuhusu uharibifu wa nguzo za ulinzi katika bwawa, akizitaka mamlaka za usalama katika kaunti kuhakikisha kwamba wahusika wanakamatwa.
Alisema kwamba wakazi wanapaswa kusaidia katika kutoa taarifa kuhusu wanaoharibu nguzo hizo.
Waziri aliyekuwa ameandamana na Gavana wa Pokot Magharibi Simon Kachapin, alitembelea kiwanda cha kusafisha maji cha Kabichbich kilichokamilika kwa asilimia 97, chenye matangi 12 ya kuhifadhi maji na jumla ya uwezo wa kuhifadhi lita bilioni 17.865 za maji.
Gavana Kachapin alisema mradi huo utabadilisha kabisa sura ya Kaunti ya Pokot Magharibi nchini Kenya kwa kuhakikisha kwamba maelfu ya wakazi wanapata maji safi na pia kuvutia uwekezaji mkubwa zaidi katika kaunti hiyo.
Kachapin alisema serikali ya kaunti ya Pokot Magharibi itashirikiana na serikali ya kitaifa kuhakikisha kwamba usimamizi bora unazingatiwa wakati mradi utakapokamilika.
