Mashambulizi kadhaa ya Israel katika Ukanda wa Gaza yameua angalau Wapalestina 14, huku zaidi ya nusu yao wakiuawa katika shambulio la ndege isiyo na rubani lililolenga msafara wa mazishi.
Miezi tisa tangu kuanza kwa utekelezaji wa makubaliano ya kusitisha mapigano kati ya Israel na Hamas, Israel inaendelea kuyakiuka karibu kila siku.
Watu wanane waliuawa katika shambulio la Israel lililolenga mkusanyiko wa raia katika eneo la soko la Al-Balata, ndani ya kambi ya wakimbizi ya Nuseirat katikati mwa Gaza siku ya Ijumaa, kwa mujibu wa shirika la ulinzi wa kiraia la Gaza na hospitali moja.
Hospitali ya Al-Awda iliongeza kuwa watu wasiopungua 20 walijeruhiwa.
Mashahidi walisema ndege isiyo na rubani iliwalenga waombolezaji Wapalestina waliokuwa wamekusanyika nje ya Msikiti wa Ahmad Yassin wakisubiri kuanza msafara wa mazishi ya Mpalestina aliyeuawa katika shambulio jingine mapema siku hiyo katika eneo hilo hilo.
Jeshi la Israel lilithibitisha kutekeleza shambulio hilo, kwa mujibu wa shirika la habari la AFP, likidai kuwa lililenga kundi la magaidi katikati mwa Gaza.
Liliongeza kwamba linafahamu madai kwamba watu kadhaa wasiohusika waliathiriwa kutokana na shambulio hilo na kwamba matokeo ya shambulio hilo bado yanachunguzwa.
Katika taarifa yake, Hamas ililaani shambulio hilo.
“Uhalifu huu wa kutisha unafanyika huku utawala huo wa uvamizi ukiendelea, kupitia ukiukaji wake wa kimfumo na unaoendelea wa makubaliano ya kusitisha mapigano huko Gaza, kuua na kuwatia hofu raia wasio na hatia mbele ya macho ya wapatanishi na jumuiya ya kimataifa,” ilisema.
