Mwanamuziki wa Uganda Alien Skin alijikuta matatani na mamlaka nchini humo Ijumaa alasiri baada ya kukamatwa pamoja na wanachama wa kundi lake la Fangone Forest katika operesheni iliyohusisha wanajeshi.
Kukamatwa huko kwa kushtukiza kulifanyika karibu na uwanja wa Wankulukuku, walioshuhudia wakisema maafisa wengi wa kijeshi walimzingira msanii huyo pamoja na wenzake kabla ya kuwachukua chini ya ulinzi.
Video zinazosambaa mtandaoni zinaonyesha maafisa waliovalia sare wakifika kwa lori na kwa haraka kulizingira kundi hilo katika operesheni iliyoratibiwa.
Ingawa mamlaka haikuwa imetoa taarifa rasmi kufikia Ijumaa jioni, inaaminika kuwa kukamatwa huko kunahusiana na madai ya matumizi mabaya ya alama za kijeshi na msanii huyo.
Mapema siku hiyo, Alien Skin alikuwa ametumbuiza katika Shule ya Sekondari ya Kitebi, akivutia umati mkubwa wa wanafunzi.
Hata hivyo, hali ilichukua mkondo mwingine baada ya video yenye utata kusambaa mtandaoni ikimuonyesha mwanamuziki huyo akiwa amevaa sare kamili za kijeshi na kuandaa kile kilichoonekana kama hafla ya “kukabidhi bendera”.
Bendera aliyotumia katika video hiyo ni ya kundi lake, kitendo ambacho huenda kilichochea hatua za haraka kutoka kwa mamlaka za kijeshi.
