Mfumo wa kisiasa wa China unajumuisha wawakilishi kutoka sekta mbalimbali za kijamii na kitaaluma katika mchakato wa kutunga sheria. Mfano halisi ni Yin Qilong, dereva wa teksi kutoka Chongqing, ambaye sasa ni mjumbe wa bunge la watu la taifa (NPC).
Akiwa na zaidi ya miaka 20 ya uzoefu barabarani, Yin alichaguliwa kuwa mbunge mwaka 2023, hatua inayodhihirisha mabadiliko kutoka mwananchi wa kawaida hadi mtunga sera wa kitaifa.
“Mwaka 2023 nilichaguliwa kuwa mwakilishi wa taifa. Kama dereva wa teksi, kupata nafasi ya kuwa mjumbe wa NPC ni jambo adimu na lenye maana kubwa kwangu,” alisema Yin katika maojiano na shirika na habari la Bridging News kutoka Chongqing.
Kwa mwaka wa tatu sasa, anashiriki katika “Mikutano Miwili” (Two Sessions), mkutano muhimu zaidi wa kisiasa nchini China unaowakutanisha watunga sera kujadili maendeleo ya taifa.
Mageuzi ya sekta ya usafiri
Ajenda ya Yin inatokana na uzoefu wake wa kazi. Ameelekeza juhudi zake katika kuhakikisha ushindani wa haki kati ya teksi za kawaida na huduma za usafiri wa mtandaoni.
“Ninazingatia kufanikisha sera ya ‘bei sawa ndani ya jiji’ kati ya teksi na huduma za mtandaoni, pamoja na kuharakisha marekebisho ya kanuni za usafiri wa barabarani,” alieleza.
Mapendekezo yake yanalenga kuoanisha mifumo ya uendeshaji na upangaji wa bei katika sekta ya usafiri mijini.
Maslahi ya madereva
Mbali na haya, Yin anazungumzia changamoto za kila siku zinazowakabili madereva, ikiwemo ukosefu wa maeneo ya kupumzika, chakula, vituo vya kuchaji na maegesho.
“Ili kukabiliana na changamoto hizi, serikali imeanza kuanzisha ‘miji rafiki’ na vituo vya huduma,” alisema, akiongeza kuwa takribani vituo 36,000 tayari vimejengwa kote nchini.
Vituo hivi vinatoa huduma muhimu kwa madereva na wafanyakazi wengine wa mijini, na kusaidia kuboresha maisha yao ya kila siku.
Yin pia anatetea matumizi ya magari ya umeme katika sekta ya teksi, akieleza kuwa yana faida kiuchumi na kimazingira.
“Magari ya nishati mpya yanatoa safari tulivu, gharama nafuu, na yanaendana na dhana ya usafiri wa kijani,” alisema.
Sauti za mashinani katika utawala
Katika mfumo wa China, wawakilishi wa mashinani wanatarajiwa kukusanya maoni ya wananchi na kuyawasilisha katika ngazi ya taifa. Yin hutumia muda mwingi kuzungumza na madereva wenzake ili kuelewa changamoto zao.
“Nimekuwa dereva kwa miaka mingi na nimeshuhudia mabadiliko makubwa katika Chongqing,” alisema.
Ametunukiwa pia heshima ya “Teksi ya Lei Feng,” inayotambua huduma bora kwa jamii.
“Usafiri unaunganisha maelfu ya familia. Wajibu wetu ni kuwasemea wananchi na kuwawakilisha,” alisisitiza.
Kupitia wawakilishi kama Yin Qilong, mfumo wa kisiasa wa China unaonyesha namna sauti za watu wa kawaida zinavyoweza kushiriki katika uundaji wa sera. Uzoefu wake wa kila siku barabarani unaendelea kuwa daraja kati ya wananchi na watunga sheria, ukionyesha utawala unaojikita katika maisha halisi ya watu.
